СЛУЖБА ПРЕСВЯТЕЙ БОГОРОДИЦЕ, ПЕРЕД ИКОНОЙ ЕЯ, ИМЕНУЕМОЙ КРУПЕЦКАЯ

В неделю по Покрове Пресвятыя Богородицы

 

Крупецкая икона Божией Матери

Стихиры на Господи воззвах: Октоиха – на 4, праздника – на 6, глас 8

Яко вышшая сущи Херувим и Серафим!/ Небесе и земли Царице!/ От ангелов славословима и от людей благословенна!/ Ныне приносимое моление приими,// едина Всепетая! (дважды)

Днесь ликовствует земля Белорусская,/ икону Твою обретши, Владычице,/ еюже нам исцеления низпосли,// Приснопокланяемая! (дважды)

Радуся, земле Минская!/ Красуйся, весе Крупецкая,/ яко зарю солнечную восприемши/ икону Божия Матере,/ к нейже ныне вси припадем/ милости и утешения требующе.

Меч подъяв пламенный/ великий Михаил Архистратиг/ низложи воинства сатанинская;/ мы же образ Твой, Богородице,/ яко хоругвь вознесше — // антихриста и христоборцы нечестивыя побеждаем.

Слава и ныне, глас 6

Под покровом Твоим, Мати Света,/ собрани есмы, людие Твои,/ руце к Тебе простирающе/ и молитвы возносяще,/ просим милосердия Твоего./ Ты же от источника Крупецкаго// верным присно изливай исцеления и чудеса.

Стихира на литии, глас 4

Граду Минску Заступница/ и благая Вратарница/ веси Крупецкия Покров/ икона Богоматере явися/ и источнику водному милости подаде,/ яко той очи страждущих исцеляет/ и души к Православию обращает// молитвою Твоею, Всечистая!

Слава и ныне, глас 5

подобен «Радуйся, Живоносный Кресте»

Радуйся, Богородице Дево,/ Ты бо подаеши обильно милости исцелений,/ очи верных врачуеши/ водами источника Крупецкаго,/ и, омофором покрывающи,/ под Свой Покров страждущыя приводиши/ и молитве научаеши,// и храмоздатели благословляеши.

На стиховне - стихиры воскресны.

Слава и ныне: праздника, глас 8:

Подобен «О преславного чудесе!»

О, Всесвятая Богородице!/ Кроткаго Твоего лика изображения/ от века землю Русскую защищают/ и Покров Твой от нея неотделим./ Крупецкую святыню лобызающе/ и водами источника омывающеся,/ Христу Богу воздыхание принесем,/ да молитвами Твоими// избавит нас от всякаго зла.

Тропарь, глас 2

Всемилостивая Владычице,/ Твоему покланяющеся Пречистому образу,/ струями источника Крупецкаго/ утоляем жажду душ наших;/ темже и всем, с верою Тебе припадающим,/ облегчение в скорбех даруй,// и покрый всечестным омофором Твоим.

На «Бог Господь» тропарь воскресен дважды, слава и ныне — праздника. По кафизмах седальны — воскресны, по полиелее — величание Богородице («Достойно есть:»), «Благословен еси, Господи», и до канона — все воскресное.

Каноны: воскресный с ирмосом на 4, канон Богородице на 2, канон празднику — на 6. Катавасия праздника. По З песни — кондак и икос воскресные, седален праздника. По 6 песни — кондак и икос праздника.

Канон праздника, глас 4,

егоже краегранесие: «БОГОМАТЕРЕ КРУПЕЦКИЯ СЛАВА».

Песнь 1.

Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Безгласная отверзаеши уста/ и хваления наполняеши духом,/ во еже пети рождшую Тя, Христе,/ и прославляти Тоя чудеса.

Отверзу недостойная уста/ и песнь принесу Ти, Дево,/ яко образ Твой явила еси/ и источник приснотекущий даровала еси,/ и воспою, радуяся, Твоя чудеса.

Гавриил Ти благую весть принесе/ и благословенну в женах нарече,/ темже и мы, покланяющеся дивному образу Твоему,/ Тя благохвалим и воспеваем Твоя чудеса.

Песнь 3.

Твоя песнословцы, Богородице, живый и независтный источниче, лик себе совокупльшия духовно утверди в Божественней Твоей славе, венцев славы сподоби.

Образ Твой чудесно явила еси, Пресвятая Богородице,/ и воду живоносную от камене источила еси,/ темже верных, зде собранных под Покровом Твоим,/ духовно утверди и венцев славы сподоби.

Мати Света,/ во дни Смуты и Унии образ Свой явившая,/ сподоби нас держатися всегда правыя стези,/ духовно утверди и в вере настави.

Апостол и благовеститель Лука/ первый лика Твоего изображение написа./ Ныне образы Твоими ограждаеши землю нашу от нашествия врагов/ и противу ересей духовно утверждаеши.

Седален

Богородице, всеблагая Помощнице, щедрая и милостивая Владычице! Заступи и избави в бедах и болезнех сущая рабы Твоя и огради нас от всякия нужды и скорби.

Слава и ныне, тойже.

Песнь 4

Седяй в славе на престоле Божества, во облаце легце, прииде Иисус Пребожественный, нетленною дланию, и спасе зовущия: слава, Христе, силе Твоей.

Твердую Ходатаицу и небесную Молитвенницу даровал еси нам, Христе./ Под омофором Ея собрани,/ песнь Седящему на Престоле принесем:/ слава, Христе, силе Твоей.

Егда явила еси образ Твой в веси Крупецстей,/ Пресвятая Владычице,/ тогда и во граде Казани икона Твоя обретеся:/ первое убо явление бурю церковную утиши,/ другое же смуту державную умири./ Явлением Богоматере разстоящаяся собираяй,/ слава, Христе, силе Твоей.

Раздоры Твоею иконою утиши, Безневестная Дево,/ богоборцы умири и маловерныя Церкви святей соедини,/ да взывают сице: слава, Мати, силе Твоей.

Песнь 5

Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога, и родила еси Безлетнаго Сына, всем воспевающим Тя мир подавающая.

Егда источила еси живоносный источник людем Твоим,/ повелела и храм Твой возвести, Дево;/ зиждителем и служителем его, и всем воспевающым Тя, мир подавающая.

Кии воскликновения принесем Ти, неискусобрачная Дево,/ ужасающеся недоведомей воле Твоей,/ понеже попустила есть разорити храм Твой,/ егда людие отвергоша веру правую.

Руки нечестивых, имиже разделение прииде, падоша;/ людие же вернии новый храм Тебе, Владычице, возставиша;/ Ты же, яко присно, достойно воспевающым Тя, мир подавай.

Песнь 6

Божественное сие и всечестное совершающе празднество, богомудрии, Богоматере, приидите руками восплещим, от Нея рождшагося Бога славим.

Узревше новый храм Твой, Богомати,/ радостнаго исполняемся пения,/ и руками плещуще, от Тебе рождшагося Бога славим.

Праздник иконы Твоея, Заступнице Крупецкая,/ радость граду Минску дарова,/ темже, богомудрии, Богоматерь величаем.

Есенный праздник совершающе Тебе, Богородительнице,/ жатву добрых дел Ти приносим, Всепетая,/ лобызающе умиленно святую икону Твою.

Кондак, глас 3

Искони славною иконою Божия Матере/ величается весь Крупецкая,/ к ней же припадающе, Богородице взываем сице:/ буди Одигитрия наша ко Господу,// да молитвами Твоими помилует души наша.

Икос

Ангельское приветствие принесем Богоотроковице и возопиим пред честным образом Ея: радуйся, православныя церкве Хранительнице, радуйся, безбожных посрамление; радуйся, душ и телес Целительнице, радуйся, очес душевных и телесных прозрение. Радуйся, из камене и земли живую воду источающая, радуйся, из окамененных сердец животворныя струи покаяния исторгающая; радуйся, Радосте наша, под Покровом Своим ко Христу нас приводящая.

Песнь 7

Не послужиша твари, богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.

Царице небесе и земли,/ грады и веси Белыя Руси оживи покровом милости Твоея,/ да радующеся вси воспоем:/ препетый отцев Господь и Бог, благословен еси.

Крупецкий образ Богородицы почитающе,/ поминаем Минскую Твою, Владычице, икону и Жировицкую святыню./ Сия от Тебе, Богомати, приемше,/ радости земля наша исполняется, и Сыну Твоему вопиет:/ препетый отцев Господь и Бог, благословен еси.

Иисус Тя Небесную лествицу показа,/ сего ради Тебе молящеся, от силы в силу восходим и Христу, радующеся, поем:/ препетый отцев Господь и Бог, благословен еси.

Песнь 8

Отроки благочестивыя в пещи рождество Богородицы спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите Его во вся веки.

Явление чудес твоих, Чистая,/ радости исполняет сердца верных,/ очи бо телесныя врачуеши/ и очи духовныя отверзаеши/ Тя превозносящым во вся веки.

Сладкоуханный крин икону твою, Богородице, явила еси./ К ней убо припадающе и со умилением лобызающе,/ Тя превозносим, Заступнице, во веки.

Любопразднственный чин ангельский/ и радостию совокупленный лик человеческий/ вселенную всю воздвизают пети тебе, Богомати, и превозносити во вся веки.

Песнь 9

Всяк земнородный да взыграется, духом просвещаем, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная, Богородице Чистая Приснодево.

Ароматы и фимиам приносим Ти, Пресвятая,/ и на всяк день Евхаристию в храме Твоем совершаем./ Темже убо не остави нас, почитающих священное Твое торжество и вопиющих:/ радуйся, Всеблаженная, Богородице чистая Приснодево.

Возрадуйтеся, храмоздателие,/ от поругания Покров Божия Матере Граду Минску возставившии/ и древнюю святыню к славе возвратившии,/ яко с вами торжествует безплотных умов естество,/ Богородицу ублажающе во веки.

Ангельския лики и от человек сладкопевцы поминающе,/ просим, Всеблагая, не осуди певцы Твоего праздника,/ но просвети духом и благослови,/ да от сердца приносимое пение во славу Твоего торжества пребудет присно.

Светилен воскресен, Слава и ныне, праздника:

Неизследное величие славы Твоея, Владычице,/ сокруши безумие антихристово,/ се бо нов твориши храм на святем месте явления Твоего,/ яко и во всей земли Русской/ возставляеши удел Твой, Мати милостивая.

Стихиры на хвалитех: воскресны 4, празднику 4, глас 2:

Восхвалим с сонмом святых/ Всепетую Богородицу,/ воспомянем преподобнаго Сергия,/ Радонежскаго чудотворца,/ яко и той воду из камене источи,/ и Богоматерь ему явися,/ и обещала есть многи ученики./ Благоволи же, Чистая, да при образе Твоем святем//многи люди имаши собрати.

Восхвалим с лики святых/ Всеблагую Владычицу,/ воспоем и преподобнаго отца нашего Серафима,/ Саровския пустыни жителя,/ яко той наипаче почита Богородицу/ и образу Умиления молися,/ да и он с нами ко Всесвятей в молитве припадет// и нас Богомати да наречет ученики возлюбленныя.

Стих: Помяну имя твое во всяком роде и роде.

Воспоем и поклонимся/ пред иконою Почаевскою,/ лобызающе след стопы Приснодевы/ и поминающе, яко Та спасаше верныя,// тако и мы Ея молитвами да утвердимся в православии.

Стих: Слыши дщи и виждь, и преклони ухо твое.

В пении чудес Твоих,/ о Богомати,/ с нами припадают соотчичи наши/ вкупе со Афанасием Берестейским,/ иже Купятицстей иконе наипаче поклоняшеся// и Тебе, Чудную, прослави.

Слава: праздника, глас 3

Землю нашу иконами Твоими озари,/ о Всемилостивая Заступнице,/ дарующи чудотворныя образы во вся концы Руси,/ да выну покланяемся// еже о нас милостивому Ея произволению.

И ныне: «Преблагословенна еси:»

Великое славословие, по Трисвятом - тропарь воскресен.

На 1 часе: тропарь воскресен, Слава: - праздника. Кондак праздника. На 3 и 6 часах попеременно кондак воскресен и праздника.

На литургии: «Блаженны» воскресны на 6, и праздника — песнь 3 — на 4. По входе: тропарь воскресный и праздника, слава — кондак воскресен, и ныне — праздника. Прокимен, Апостол, Евангелие, причастен — воскресный и праздника.

Рубрыка: